भ्रष्टाचाराविरोधात बातमी लिहिणाऱ्या पत्रकाराच्या घरी मध्यरात्री छापा; पोलिस व उत्पादन शुल्क विभागाच्या कारवाईवर प्रश्नचिन्ह
भ्रष्टाचाराविरोधात बातमी लिहिणाऱ्या पत्रकाराच्या घरी मध्यरात्री छापा;
पोलिस व उत्पादन शुल्क विभागाच्या कारवाईवर प्रश्नचिन्ह
नवी दिल्ली/वृत्तसेवा
बिहारमधील वैशाली जिल्ह्यात एका पत्रकाराच्या घरावर रात्री उशिरा टाकण्यात आलेल्या छाप्यामुळे प्रशासन आणि पोलिसांच्या कार्यपद्धतीवर गंभीर प्रश्न उपस्थित झाले आहेत. भ्रष्टाचाराशी संबंधित वृत्तांकन केल्यामुळेच आपल्याला लक्ष्य करण्यात आल्याचा आरोप संबंधित पत्रकाराने केला असून, या घटनेमुळे पत्रकार संघटना, सामाजिक कार्यकर्ते आणि स्थानिक नागरिकांमध्ये संतापाची लाट उसळली आहे.
मिळालेल्या माहितीनुसार, वैशाली जिल्ह्याचे मुख्यालय असलेल्या हाजीपूर येथील पत्रकार मनीष कुमार सिंह यांच्या निवासस्थानी मंगळवारी रात्री सुमारे १० वाजण्याच्या सुमारास उत्पादन शुल्क विभाग आणि शहर पोलीस ठाण्याच्या संयुक्त पथकाने अचानक धाड टाकली. यावेळी पाच वाहनांमधून आलेल्या अधिकाऱ्यांसोबत मोठा पोलीस बंदोबस्तही होता.
कुटुंब झोपण्याच्या तयारीत असताना अचानक घरावर पोहोचलेल्या पथकाने दारू शोध मोहिमेच्या नावाखाली तपास सुरू केला. यावेळी पत्रकार मनीष कुमार सिंह यांची ब्रेथलायझरद्वारे अल्कोहोल चाचणी करण्यात आली. मात्र, चाचणीचा अहवाल पूर्णपणे नकारात्मक आला आणि शरीरात अल्कोहोलचे कोणतेही प्रमाण आढळून आले नाही.
"दारू न पिता देखील मानसिक छळ"
या घटनेनंतर पत्रकार मनीष कुमार सिंह यांनी प्रशासनावर गंभीर आरोप केले आहेत. त्यांनी सांगितले की, त्यांच्या कुटुंबातील कोणतीही व्यक्ती मद्यपान करत नाही. असे असतानाही संशयाच्या आधारावर त्यांच्या घरावर छापा टाकून मानसिक छळ करण्यात आला.
घटनेदरम्यान त्यांनी मोबाईलवर व्हिडिओ चित्रीकरण केले. या व्हिडिओमध्ये एक महिला पोलीस कर्मचारी त्यांना ब्रेथलायझरमध्ये श्वास फुंकण्यास सांगताना दिसत आहे. चाचणीमध्ये अल्कोहोलचे प्रमाण शून्य आढळल्यानंतर महिला कर्मचाऱ्याने साध्या वेशातील एका तरुणाकडे संशय व्यक्त केला. मात्र, उपस्थित उत्पादन शुल्क निरीक्षकाने तिला त्याबाबत फटकारल्याचेही व्हिडिओत दिसून येते. या घटनेनंतर दोन्ही अधिकाऱ्यांमध्ये वाद झाल्याची माहिती समोर आली आहे.
जिल्हाधिकाऱ्यांवरील वृत्तांकनामुळे कारवाई?
छाप्यानंतर मनीष कुमार सिंह यांनी फेसबुकवर एक व्हिडिओ प्रसिद्ध करून गंभीर आरोप केले. त्यांनी दावा केला की, वैशालीच्या जिल्हाधिकारी वर्षा सिंह यांच्याशी संबंधित कथित भ्रष्टाचाराच्या प्रकरणांवर त्यांनी काही दिवसांपूर्वी वृत्तांकन केले होते. त्यानंतरच प्रशासनाकडून त्यांच्यावर दबाव आणण्याचा प्रयत्न सुरू झाल्याचे त्यांनी म्हटले आहे.
मनीष कुमार सिंह यांच्या मते, जिल्हाधिकाऱ्यांनी त्यांच्या वृत्तांबाबत पुरावे मागितले होते. त्यानुसार सर्व आवश्यक कागदपत्रे आणि पुरावे त्यांनी लेखी स्वरूपात सादर केले. मात्र, त्यानंतरही त्यांना आणि त्यांच्या कुटुंबीयांना त्रास दिला जात असल्याचा आरोप त्यांनी केला आहे.
त्यांनी पुढे असा इशाराही दिला की, त्यांच्या घरावर पुन्हा छापे टाकले जाऊ शकतात किंवा त्यांच्या परिचितांना त्रास दिला जाऊ शकतो.
मद्यबंदी धोरणावरही उपस्थित झाले प्रश्न
या घटनेनंतर हाजीपूरमधील अनेक नागरिकांनी बिहारमधील मद्यबंदी धोरण आणि त्याच्या अंमलबजावणीवर प्रश्न उपस्थित केले आहेत. स्थानिकांच्या म्हणण्यानुसार, राजेंद्र चौक परिसरातील तसेच उत्पादन शुल्क विभागाच्या कार्यालयालगत असलेल्या नाल्यांची साफसफाई होत असताना मोठ्या प्रमाणावर देशी व विदेशी मद्याच्या रिकाम्या बाटल्या आढळून येतात.
अशा परिस्थितीत अवैध मद्यविक्री रोखण्यात अपयशी ठरलेल्या यंत्रणा आता सामान्य नागरिक आणि पत्रकारांच्या घरात रात्री उशिरा घुसून तपास करत असल्याचा आरोप स्थानिकांकडून करण्यात येत आहे.
निष्पक्ष चौकशीची मागणी
या घटनेचे व्हिडिओ सोशल मीडियावर व्हायरल झाल्यानंतर पत्रकार संघटना आणि विविध सामाजिक संघटनांनी निष्पक्ष चौकशीची मागणी केली आहे. पत्रकारांना लक्ष्य करून प्रशासनाकडून दबाव तंत्राचा वापर होत आहे का, याची स्वतंत्र चौकशी व्हावी, अशी मागणी अनेक स्तरांतून केली जात आहे.
दरम्यान, या प्रकरणाबाबत उत्पादन शुल्क विभाग आणि स्थानिक पोलिसांकडून अधिकृत स्पष्टीकरणाची प्रतीक्षा असून, संपूर्ण घटनेमागील सत्य काय आहे, याकडे सर्वांचे लक्ष लागले आहे.
टिप्पण्या