मुंबई विमानतळावरील ५ कोटींच्या सोन्याच्या तस्करीचा पर्दाफाश; भाजप पदाधिकाऱ्यासह सहा जणांना अटक, राजकीय आरोप-प्रत्यारोपांना उधाण
मुंबई विमानतळावरील ५ कोटींच्या सोन्याच्या तस्करीचा पर्दाफाश;
भाजप पदाधिकाऱ्यासह सहा जणांना अटक,
राजकीय आरोप-प्रत्यारोपांना उधाण
मुंबई/वृत्तसेवा
मुंबई आंतरराष्ट्रीय विमानतळावर महसूल गुप्तवार्ता संचालनालय (DRI) यांनी केलेल्या धडक कारवाईत ५ कोटी रुपयांहून अधिक किमतीच्या सोन्याच्या तस्करीचा मोठा पर्दाफाश झाला आहे. या प्रकरणात भाजपच्या कामगार संघटनेचे चिटणीस अजित आचरेकर यांच्यासह सहा जणांना अटक करण्यात आली असून मोठ्या प्रमाणात सोने व इतर मुद्देमाल जप्त करण्यात आला आहे. या कारवाईमुळे राजकीय वर्तुळात खळबळ उडाली आहे.
मिळालेल्या माहितीनुसार, डीआरआयच्या पथकाला मुंबई विमानतळामार्गे मोठ्या प्रमाणावर सोन्याची तस्करी होणार असल्याची गोपनीय माहिती मिळाली होती. त्यानुसार ६ जून रोजी विमानतळावर विशेष सापळा रचण्यात आला. तपासणीदरम्यान परदेशातून आलेल्या संशयितांकडून सुमारे ३.२ किलो सोने जप्त करण्यात आले. हे सोने विशेष प्रकारच्या कॅप्सूलमध्ये लपवून आणल्याचे तपासात समोर आले आहे.
या प्रकरणात अजित आचरेकर, विमानतळाशी संबंधित काही कर्मचारी तसेच परदेशी नागरिकांसह एकूण आरोपींना अटक करण्यात आली आहे. जप्त करण्यात आलेल्या सोन्याची किंमत ५ कोटी रुपयांपेक्षा अधिक असल्याचे सांगितले जात आहे.
प्राथमिक माहितीनुसार, अजित आचरेकर हे भाजपच्या कामगार संघटनेचे चिटणीस असून काही महिन्यांपूर्वी त्यांनी भाजपमध्ये प्रवेश केला होता. त्या वेळी भाजप प्रदेशाध्यक्ष रवींद्र चव्हाण यांच्या उपस्थितीत त्यांचा पक्षप्रवेश झाला होता. त्यानंतर पक्षाकडून त्यांच्यावर कामगार संघटनेची जबाबदारी सोपविण्यात आली होती.
दरम्यान, या कारवाईनंतर ठाकरे गटाचे खासदार संजय राऊत यांनी भाजप आणि प्रदेशाध्यक्ष रवींद्र चव्हाण यांच्यावर गंभीर आरोप केले आहेत. राऊत यांनी प्रसिद्ध केलेल्या प्रतिक्रियेत रवींद्र चव्हाण यांच्या कार्यपद्धतीवर प्रश्नचिन्ह उपस्थित करत, विमानतळावरील कामगार संघटनांवर नियंत्रण मिळविण्यासाठी दबावतंत्र वापरल्याचा आरोप केला आहे. तसेच अटक करण्यात आलेल्या व्यक्तींचे राजकीय संबंध तपासण्याची मागणीही त्यांनी केली आहे.
राऊत यांनी पुढे असा दावाही केला की, या प्रकरणाची सखोल चौकशी झाल्यास अनेक आर्थिक आणि राजकीय बाबी समोर येऊ शकतात. मात्र, हे सर्व आरोप असून त्याबाबत कोणताही अधिकृत निष्कर्ष अथवा तपास यंत्रणांची पुष्टी अद्याप झालेली नाही.
दुसरीकडे, डीआरआयने अद्याप तपासाच्या हितास्तव या प्रकरणातील सर्व तपशील जाहीर केलेले नाहीत. हे आंतरराष्ट्रीय सोन्याच्या तस्करीचे रॅकेट आहे का, या रॅकेटमागील मुख्य सूत्रधार कोण आहे, तसेच यामध्ये आणखी कोणत्या प्रभावशाली व्यक्ती किंवा घटकांचा सहभाग आहे का, याचा तपास सुरू असल्याचे सूत्रांनी सांगितले.
या प्रकरणामुळे राजकीय आरोप-प्रत्यारोपांना सुरुवात झाली असली तरी तपास यंत्रणांकडून अद्याप कोणत्याही राजकीय पक्षाची किंवा वरिष्ठ नेत्याची थेट जबाबदारी निश्चित करण्यात आलेली नाही. त्यामुळे पुढील तपास आणि न्यायालयीन प्रक्रियेनंतरच या प्रकरणातील संपूर्ण सत्य स्पष्ट होणार आहे.
टिप्पण्या