चार आरोपींपैकी दोन उमेदवार गुणवत्ता यादीतील टॉपर्स! बुलढाण्यातील आरोपी विजय किंगर होता चौथ्या क्रमांकाचा टॉपर!! एमपीएससी औषध निरीक्षक पेपरलीक प्रकरणाने घेतले धक्कादायक वळण; ११ जण अटकेत

चार आरोपींपैकी दोन उमेदवार गुणवत्ता यादीतील टॉपर्स!

बुलढाण्यातील आरोपी विजय किंगर होता चौथ्या क्रमांकाचा टॉपर!!

एमपीएससी औषध निरीक्षक पेपरलीक प्रकरणाने घेतले धक्कादायक वळण; 

११ जण अटकेत

मुंबई/वृत्तसेवा :

महाराष्ट्र लोकसेवा आयोगाच्या (एमपीएससी) औषध निरीक्षक भरती परीक्षेतील पेपरफुटी प्रकरणाने आता गंभीर वळण घेतले आहे. प्रश्नपत्रिका फुटवून त्याचा फायदा घेतल्याच्या संशयावरून अटक करण्यात आलेल्या चार आरोपींपैकी दोन आरोपी हे स्वतः परीक्षार्थी असून, ते अंतरिम गुणवत्ता यादीतील टॉपर्स असल्याचे तपासात समोर आल्याचे पोलिस सूत्रांनी सांगितले आहे. या नव्या अटकेमुळे या प्रकरणातील एकूण आरोपींची संख्या आता ११ वर पोहोचली आहे.

प्रसारमाध्यमांतील वृत्तांनुसार, गुन्हे शाखा आणि विशेष तपास पथकाने केलेल्या तपासात प्रश्नपत्रिका बेकायदेशीर मार्गाने मिळवून त्याचा लाभ घेतल्याचा संशय असलेल्या उमेदवारांपर्यंत तपासाची साखळी पोहोचली आहे. साजिद संदे आणि विजय किंगर या दोन उमेदवारांना पोलिसांनी अटक केली आहे.

१५२.५० गुण घेणारा तिसरा; १५६ गुणांचा उमेदवार चौथा!

सांगली येथून अटक करण्यात आलेला साजिद संदे याने लेखी परीक्षेत १५२.५० गुण मिळवले होते. तो अंतरिम गुणवत्ता यादीत तिसऱ्या क्रमांकावर असल्याचे सांगण्यात येत आहे.

तर बुलढाणा येथून अटक करण्यात आलेल्या विजय किंगर याने तब्बल १५६ गुण मिळवत अंतरिम गुणवत्ता यादीत चौथा क्रमांक मिळवला होता.

त्यामुळे प्रश्नपत्रिका फुटीचा फायदा नेमक्या कोणकोणत्या उमेदवारांना झाला, गुणवत्ता यादीतील आणखी किती उमेदवार या रॅकेटच्या संपर्कात होते आणि प्रश्नपत्रिका मिळाल्यानंतर गुण मिळवण्याची संपूर्ण यंत्रणा कशी चालवली जात होती, याचा तपास आता पोलिसांकडून केला जात आहे.

आधीची अटकही टॉपर उमेदवाराला!

या प्रकरणात यापूर्वी अटक करण्यात आलेली ऋतुजा पाटील हीदेखील अंतरिम गुणवत्ता यादीत १५५ गुणांसह सातव्या क्रमांकावर असल्याचे तपासातून समोर आले होते.

विशेष म्हणजे, तपासादरम्यान संशय निर्माण होऊ नये म्हणून ऋतुजाला मुद्दाम दहा प्रश्नांची उत्तरे चुकीची लिहिण्यास सांगण्यात आले होते, अशी माहिती तपासात समोर आल्याचे वृत्त आहे. या दाव्याची सविस्तर पडताळणी तपास यंत्रणेकडून केली जात आहे.

प्रश्नपत्रिका पुरवणारे मध्यस्थही जाळ्यात

या कथित पेपरलीक रॅकेटमध्ये उमेदवारांपर्यंत प्रश्नपत्रिका पोहोचवणे आणि पैशांची देवाणघेवाण करण्यासाठी मध्यस्थांची भूमिका असल्याचा संशय आहे. याप्रकरणी संदीप खलाटे आणि भैरवनाथ कदम या दोघांना नवी मुंबईतून अटक करण्यात आली आहे.

तपासातील माहितीनुसार, खलाटे हा विक्रीकर निरीक्षक, तर कदम हा भारतीय नौदलातील सिव्हिल टेक्निशियन असल्याचे सांगण्यात येत आहे. त्यामुळे सरकारी यंत्रणेत कार्यरत व्यक्तींचा या कथित रॅकेटशी नेमका संबंध काय, याचा तपासही महत्त्वाचा ठरणार आहे.

एमपीएससीच्या गोपनीय यंत्रणेवरच प्रश्नचिन्ह!

या प्रकरणात यापूर्वी एमपीएससीचे अवर सचिव अभिजित लेंढवे, अधिकारी विश्वेश्वर नाकाटे, गोपाळ मराठे, कौटिल्य अकॅडमीचे संचालक प्रवीण पाटील आणि उमेदवार ऋतुजा पाटील यांच्यासह इतरांना अटक करण्यात आली आहे.

संपूर्ण प्रकरणातील सर्वात गंभीर बाब म्हणजे एमपीएससीच्या गोपनीय कक्षातूनच प्रश्नपत्रिका बाहेर गेल्याचा तपास यंत्रणांचा संशय आहे. त्यामुळे केवळ काही उमेदवारांनी गैरप्रकार केला की, त्यामागे प्रश्नपत्रिका तयार करण्यापासून ती बाहेर पोहोचवण्यापर्यंतची व्यापक साखळी कार्यरत होती, याचा तपास आता निर्णायक ठरणार आहे.

१५४ पदांची परीक्षा; अखेर संपूर्ण भरतीच रद्द

अन्न व औषध प्रशासनातील १५४ औषध निरीक्षक (गट-ब) पदांसाठी २२ मार्च २०२६ रोजी परीक्षा घेण्यात आली होती. मात्र प्रश्नपत्रिका फुटल्याचे प्रकरण उघडकीस आल्यानंतर परीक्षेच्या विश्वासार्हतेवर गंभीर प्रश्नचिन्ह निर्माण झाले.

उमेदवारांमध्ये पारदर्शकतेबाबत निर्माण झालेला संशय दूर करण्यासाठी एमपीएससीने संपूर्ण भरती प्रक्रिया आणि परीक्षा रद्द करण्याचा निर्णय घेतला.

मात्र, भरती प्रक्रिया रद्द झाल्यानंतरही या प्रकरणाचे धागेदोरे एकामागून एक समोर येत आहेत. टॉपर्सच पोलिसांच्या रडारवर आल्याने पेपरफुटी प्रकरणाचे गांभीर्य आणखी वाढले आहे.

नवी परीक्षा कधी? उमेदवारांचे लक्ष आयोगाच्या घोषणेकडे

एमपीएससीने भरती प्रक्रिया रद्द करण्याबाबत अधिकृत प्रसिद्धीपत्रक जारी केले असले, तरी नवीन परीक्षेची निश्चित तारीख अद्याप जाहीर झालेली नाही.

दरम्यान, गुन्हे शाखेकडून रॅकेटचा तपास सुरू असून, तपासातून आणखी कोणती नावे समोर येतात, प्रश्नपत्रिका नेमकी कुठून बाहेर पडली, तिची किंमत किती ठरली, किती उमेदवारांपर्यंत ती पोहोचली आणि या कथित रॅकेटमागे आणखी कोणकोणते चेहरे आहेत, याकडे आता राज्यातील हजारो उमेदवारांचे लक्ष लागले आहे.

एमपीएससीसारख्या राज्यातील सर्वोच्च स्पर्धा परीक्षा घेणाऱ्या संस्थेच्या गोपनीय यंत्रणेतच प्रश्नपत्रिका फुटल्याचा आरोप आणि त्यानंतर गुणवत्ता यादीतील उच्च क्रमांकावरील उमेदवारांच्या अटकांमुळे या प्रकरणाने राज्यातील स्पर्धा परीक्षांच्या विश्वासार्हतेवरच मोठा प्रश्न उभा केला आहे.