बीड जिल्हा रुग्णालयातील डॉक्टरांचा गंभीर निष्काळजीपणा :: नवमातेची मृत्यूशी झुंज
बीड जिल्हा रुग्णालयातील डॉक्टरांचा गंभीर निष्काळजीपणा
नवमातेची मृत्यूशी झुंज
बीड / वृत्तसेवा
बीड जिल्हा सामान्य रुग्णालयातून डॉक्टरांच्या घोर हलगर्जीपणाचा एक अत्यंत संतापजनक आणि धक्कादायक प्रकार समोर आला आहे. सीझेरियन शस्त्रक्रियेदरम्यान १९ वर्षीय नवमातेच्या पोटात सर्जिकल हातमोजे आणि कागदी रुमाल तसेच सोडून टाकण्यात आल्याने पीडित महिला सध्या मृत्यूशी झुंज देत आहे. या प्रकरणाने संपूर्ण बीड परिसरात तीव्र संतापाची लाट उसळली आहे.
पीडित महिलेचे नाव संध्या सूरज गायकवाड असे असून तिचे वय अवघे १९ वर्षे आहे. बाळंतपणासाठी तिला बीड जिल्हा रुग्णालयात दाखल करण्यात आले होते. २ ऑगस्ट रोजी तिच्यावर सीझेरियन शस्त्रक्रिया करण्यात आली आणि तिने एका बाळाला जन्म दिला. शस्त्रक्रियेनंतर चार दिवसांनी तिला घरी पाठवण्यात आले. मात्र घरी गेल्यानंतर तिच्या पोटात तीव्र वेदना सुरू झाल्या. स्थानिक खाजगी रुग्णालयात तपासणी केली असता डॉक्टरांना पोटात काहीतरी परकीय वस्तू असल्याचे आढळून आले.
प्रकृती झपाट्याने खालावल्याने कुटुंबीयांनी तिला तातडीने पुण्यातील ससून रुग्णालयात हलवले. तेथे १२ किंवा १३ ऑगस्ट रोजी तिच्यावर दुसरी मोठी शस्त्रक्रिया करण्यात आली. या शस्त्रक्रियेत तिच्या पोटातून सर्जिकल हातमोजे आणि कागदी रुमाल बाहेर काढण्यात आले. पोटात राहिलेल्या या वस्तूंमुळे संपूर्ण उदरपोकळीत गंभीर संसर्ग पसरला होता. पू तयार झाला होता, आतडे सडले होते आणि गर्भाशय पूर्णपणे खराब झाले होते. परिणामी डॉक्टरना गर्भाशय काढून टाकावे लागले. सध्या संध्याची प्रकृती अत्यंत गंभीर असून ती मृत्यूशी झुंज देत आहे.
या घटनेनंतर पीडित कुटुंबीय आणि बीड परिसरातील नागरिकांमध्ये तीव्र संताप व्यक्त होत आहे. शासकीय रुग्णालयातील अशा भोंगाळ आणि बेजबाबदार कारभारामुळे एका तरुण मातेचा जीव धोक्यात आला असल्याने दोषी डॉक्टरांवर आणि संबंधित कर्मचाऱ्यांवर कडक कायदेशीर कारवाई करण्याची जोरदार मागणी होत आहे.
या गंभीर निष्काळजीपणाची दखल घेत बीडचे जिल्हा शल्यचिकित्सक यांनी संबंधित महिला डॉक्टर आणि वैद्यकीय कर्मचाऱ्यांना कारणे दाखवा नोटीस बजावल्या आहेत. दोषी आढळल्यास त्यांच्यावर कठोर कायदेशीर कारवाई केली जाईल, असे आरोग्य विभागाने आश्वासन दिले आहे. रुग्णालय प्रशासनाने अंतर्गत स्तरावर एक विशेष वैद्यकीय समिती स्थापन केली आहे. ही समिती शस्त्रक्रियेदरम्यान नेमकी काय चूक झाली, शस्त्रक्रियेपूर्वी आणि नंतर सर्जिकल साहित्याची मोजणी का केली गेली नाही याची सविस्तर चौकशी करत आहे. चौकशी अहवाल प्राप्त होताच दोषी आढळणाऱ्या डॉक्टर आणि कर्मचाऱ्यांवर निलंबन तसेच फौजदारी गुन्हे दाखल करण्यासारखी कठोर प्रशासकीय व कायदेशीर कारवाई केली जाईल, असे प्रशासनाने स्पष्ट केले आहे.
या घटनेने शासकीय रुग्णालयातील शस्त्रक्रिया प्रक्रिया आणि रुग्णसुरक्षेबाबत गंभीर प्रश्न उपस्थित केले आहेत. एका तरुण मातेच्या जीवाशी खेळले गेल्याने संपूर्ण समाज या प्रकरणाकडे लक्ष वेधून पाहत आहे.
टिप्पण्या