क्रांतीज्योती सावित्रीबाई फुले न.प. मराठी प्राथमिक शाळा क्र. १ च्या शालेय व्यवस्थापन समितीची बिनविरोध निवड :: अध्यक्षपदी किरण डोईफोडे, उपाध्यक्षपदी मनीषाताई सरपते; शिक्षण तज्ञ म्हणून सुरज गुप्ता यांची निवड

क्रांतीज्योती सावित्रीबाई फुले 

न.प. मराठी प्राथमिक शाळा क्र. १ च्या 

शालेय व्यवस्थापन समितीची बिनविरोध निवड

अध्यक्षपदी किरण डोईफोडे, 

उपाध्यक्षपदी मनीषाताई सरपते; 

शिक्षण तज्ञ म्हणून सुरज गुप्ता यांची निवड

देऊळगावराजा : 

येथील क्रांतीज्योती सावित्रीबाई ज्योतिराव फुले न.प. मराठी प्राथमिक शाळा क्रमांक १ येथे शिक्षणाचा अधिकार अधिनियम (RTE Act, 2009) मधील तरतुदींनुसार शालेय व्यवस्थापन समितीची निवड प्रक्रिया नुकतीच पार पडली. पालक सभेत सर्वानुमते व बिनविरोध पद्धतीने नूतन शालेय व्यवस्थापन समितीची निवड करण्यात आली. या निवडीमुळे शाळेच्या शैक्षणिक, भौतिक तसेच प्रशासकीय विकासाला अधिक चालना मिळण्याची अपेक्षा व्यक्त करण्यात आली.

दि. २० ऑगस्ट रोजी गुरुवारी शाळेच्या परिसरात पालक सभेचे आयोजन करण्यात आले होते. या सभेच्या अध्यक्षस्थानी ज्येष्ठ सदस्य बळीराम मापारी होते. यावेळी शाळेच्या मुख्याध्यापिका सौ. राजमाने यांनी शालेय व्यवस्थापन समितीची भूमिका, जबाबदाऱ्या आणि शाळेच्या विकासातील महत्त्व याबाबत उपस्थित पालकांना मार्गदर्शन केले.

शालेय व्यवस्थापन समितीच्या अध्यक्षपदी किरण डोईफोडे, तर उपाध्यक्षपदी मनीषाताई सरपते यांची बिनविरोध निवड करण्यात आली. शिक्षण तज्ज्ञ म्हणून सुरज गुप्ता यांची निवड झाली. समितीच्या सदस्यपदी पत्रकार विलास जगताप, ॲड. भालचंद्र डोईफोडे, ॲड. परमेश्वर शेलके, लताताई बोरकर, साधनाताई पवार, वैशालीताई गवळी, अनुराधाताई पवार, अश्विनीताई गव्हाणे आणि जावेद खान यांची निवड करण्यात आली.

यावेळी मार्गदर्शन करताना मुख्याध्यापिका सौ. राजमाने यांनी सांगितले की, RTE कायद्यानुसार शालेय व्यवस्थापन समिती ही शाळा, पालक आणि समाज यांच्यातील समन्वयाचे महत्त्वाचे माध्यम आहे. विद्यार्थ्यांना गुणवत्तापूर्ण व समान शैक्षणिक संधी उपलब्ध करून देणे, शाळेतील शैक्षणिक वातावरण अधिक सक्षम करणे, उपलब्ध शैक्षणिक व भौतिक सुविधांचा योग्य वापर करणे, शाळा विकास आराखडा तयार करणे तसेच विद्यार्थ्यांच्या हक्कांचे संरक्षण करण्यामध्ये समितीची भूमिका महत्त्वपूर्ण आहे.

नवनिर्वाचित समितीच्या माध्यमातून शाळेच्या शैक्षणिक गुणवत्तेत वाढ करण्यासोबतच विद्यार्थ्यांच्या सर्वांगीण विकासासाठी विविध शैक्षणिक, सांस्कृतिक, क्रीडा व सामाजिक उपक्रम राबविण्यावर भर दिला जाणार आहे. शाळेतील आवश्यक भौतिक सुविधांचा विकास, विद्यार्थ्यांना सुरक्षित व आनंददायी शैक्षणिक वातावरण उपलब्ध करून देणे, पालकांचा शाळेच्या उपक्रमांमध्ये सक्रिय सहभाग वाढविणे तसेच पालक-शिक्षक-समाज यांच्यातील समन्वय अधिक दृढ करण्यासाठी समिती प्रयत्नशील राहणार असल्याचे यावेळी सांगण्यात आले.

शाळेच्या प्रगतीसाठी केवळ शिक्षक व शाळा प्रशासनाचीच नव्हे, तर पालक आणि समाजाचीही सक्रिय भूमिका आवश्यक आहे. विद्यार्थ्यांच्या गुणवत्तापूर्ण शिक्षणासोबतच त्यांच्यातील कलागुण, क्रीडा कौशल्य, सर्जनशीलता, शिस्त, सामाजिक जाणीव आणि आत्मविश्वास वाढविण्यासाठी शाळा व पालकांनी एकत्रितपणे काम करण्याची गरज असल्याचेही यावेळी अधोरेखित करण्यात आले.

कार्यक्रमाचे प्रास्ताविक मंगल गाडगे यांनी केले, तर आभार अनिल बुरकुल यांनी मानले. कार्यक्रमाच्या यशस्वीतेसाठी शिक्षक सतीश पिंगळे, प्रदीप गाडे, अनंता सानप, सुधाकर इंगळे, तसेच शिक्षिका संगीता कुमठे, प्रतिभा लोंढे, जिजा जीठे, उर्मिला वाघ, संगीता देवकर, रिता वाघ आदी शिक्षक व कर्मचाऱ्यांनी परिश्रम घेतले.

नूतन शालेय व्यवस्थापन समितीच्या अध्यक्ष, उपाध्यक्ष, शिक्षण तज्ज्ञ आणि सर्व सदस्यांचे मुख्याध्यापक, शिक्षक व कर्मचारीवृंद, समस्त पालकवर्ग तसेच क्रांतीज्योती सावित्रीबाई ज्योतिराव फुले न.प. मराठी प्राथमिक शाळा क्रमांक १ यांच्या वतीने अभिनंदन करण्यात आले. शाळेच्या सर्वांगीण विकासासाठी नवनिर्वाचित समितीच्या माध्यमातून प्रभावीपणे कार्य होईल आणि विद्यार्थ्यांच्या शैक्षणिक प्रगतीला अधिक बळ मिळेल, असा विश्वास यावेळी व्यक्त करण्यात आला.