अंढेरा-मलकापूर पांग्रा मार्गावर उभ्या आयशरला दुचाकीची जोरदार धडक; दोन युवक गंभीर एका युवकाची प्रकृती चिंताजनक; रस्त्यावर वाहने बेजबाबदारपणे उभी करण्याच्या प्रकारामुळे ग्रामस्थ संतप्त

अंढेरा-मलकापूर पांग्रा मार्गावर उभ्या आयशरला दुचाकीची जोरदार धडक; 

दोन युवक गंभीर

एका युवकाची प्रकृती चिंताजनक; 

रस्त्यावर वाहने बेजबाबदारपणे उभी करण्याच्या प्रकारामुळे ग्रामस्थ संतप्त

मलकापूर पांग्रा : 

अंढेरा-मलकापूर पांग्रा मार्गावर रस्त्याच्या वाहतुकीच्या विरुद्ध दिशेने उभ्या असलेल्या आयशरला दुचाकीने जोरदार धडक दिल्याने दोन युवक गंभीर जखमी झाल्याची धक्कादायक घटना शनिवारी (दि. २२ ऑगस्ट) सायंकाळी साडेपाच वाजेच्या सुमारास घडली. या अपघातातील एका युवकाची प्रकृती चिंताजनक असल्याची माहिती आहे. या घटनेमुळे परिसरात खळबळ उडाली असून, रस्त्यावर वाहने उभी करणाऱ्यांच्या बेजबाबदारपणाचा मुद्दा पुन्हा ऐरणीवर आला आहे.

मिळालेल्या माहितीनुसार, मलकापूर पांग्रा-अंढेरा मार्गावरील उच्च प्राथमिक उर्दू शाळेजवळ आयशर क्रमांक एमएच २८ बीबी ५६०४ हे वाहन वाहतुकीच्या विरुद्ध दिशेने रस्त्यावर उभे करण्यात आले होते. दरम्यान, डोरव्ही येथे कामानिमित्त गेलेले आकाश तेजराव साळवे (वय २८) आणि त्यांच्यासोबत असलेले ताजीम नाझीम पठाण (वय १९) हे युनिकॉन दुचाकी क्रमांक एमएच २८ सीए २२४९ वरून मलकापूर पांग्र्याकडे परतत होते.

शाळेजवळ येताच रस्त्यावर विरुद्ध दिशेने उभ्या असलेल्या आयशरला त्यांच्या दुचाकीची मागून जोरदार धडक बसली. धडक इतकी भीषण होती की दोन्ही युवक गंभीर जखमी झाले. अपघाताचा आवाज ऐकून परिसरातील नागरिकांनी घटनास्थळी धाव घेतली. ग्रामस्थांनी तत्काळ दोन्ही जखमींना मलकापूर पांग्रा येथील खासगी रुग्णालयात दाखल केले.

मात्र, दोघांचीही प्रकृती गंभीर असल्याने प्राथमिक उपचारानंतर डॉक्टरांच्या सल्ल्याने त्यांना पुढील उपचारासाठी जालना येथील खासगी रुग्णालयात हलविण्यात आले. त्यापैकी एका युवकाची प्रकृती चिंताजनक असल्याचे सांगण्यात येत आहे. वृत्त लिहेपर्यंत या अपघातप्रकरणी कोणतीही अधिकृत कारवाई झालेली नव्हती.

रुंदीकरण झाले, पण रस्त्यावरील अडथळे कायम!

मलकापूर पांग्रा-अंढेरा मार्गाचे गेल्या वर्षी रुंदीकरण करण्यात आले. त्यामुळे वाहतुकीची समस्या काही प्रमाणात कमी होईल, अशी अपेक्षा होती. मात्र, रस्त्याच्या कडेला किंवा थेट वाहतुकीच्या मार्गावर वाहने उभी करण्याचा प्रकार अद्यापही सुरू असल्याने रुंदीकरणाचा उद्देशच धुळीस मिळत असल्याचे चित्र आहे.

गावातील अनेक ठिकाणी नागरिकांकडून रस्त्यावरच वाहने उभी केली जातात. परिणामी, प्रत्यक्ष वाहतुकीसाठी उपलब्ध असलेली जागा कमी होते. मोठे वाहन रस्त्यावर उभे असताना समोरून येणाऱ्या वाहनांना मार्ग काढताना मोठी कसरत करावी लागते. अशा परिस्थितीत एखाद्या वाहनचालकाचे नियंत्रण सुटले किंवा समोर उभे वाहन वेळेत लक्षात आले नाही, तर अपघात होण्यास वेळ लागत नाही.

‘आयशर रस्त्यावर नसते तर अपघात टळला असता?’

शनिवारी घडलेल्या अपघातानंतर हा प्रश्न ग्रामस्थांकडून उपस्थित केला जात आहे. वाहतुकीच्या विरुद्ध दिशेने मोठे वाहन रस्त्यावर उभे असल्यामुळे दुचाकीस्वाराला परिस्थितीचा अंदाज घेण्यास अडथळा निर्माण झाला का, याचीही चौकशी होणे गरजेचे आहे.

रस्ता रुंद असतानाही जर वाहनचालकांना सुरक्षितपणे वाहतूक करता येत नसेल, तर रुंदीकरणाचा उपयोग काय, असा संतप्त सवाल ग्रामस्थांकडून उपस्थित केला जात आहे.

कारवाई केव्हा होणार?

रस्त्यावर बेदरकारपणे वाहने उभी करणाऱ्यांवर संबंधित यंत्रणेने कठोर कारवाई करावी, अशी मागणी आता जोर धरत आहे. विशेषतः मोठी वाहने रस्त्यावर उभी करून वाहतुकीला अडथळा निर्माण करणाऱ्यांवर दंडात्मक कारवाई करण्याची गरज आहे.

ग्रामपंचायतीनेही केवळ अपघात घडल्यानंतर जागे होण्याऐवजी रस्त्यावरील अतिक्रमणे, अनधिकृत पार्किंग आणि वाहतुकीला अडथळा ठरणारी वाहने याबाबत तातडीने मोहीम राबवावी, अशी मागणी ग्रामस्थांनी केली आहे.

एकीकडे रस्त्याचे रुंदीकरण करून शासन लाखो रुपये खर्च करते आणि दुसरीकडे त्याच रस्त्यावर वाहने उभी करून वाहतुकीची वाट रोखली जाते, ही विसंगती गंभीर आहे. आज दोन युवक गंभीर जखमी झाले आहेत; उद्या एखाद्याचा जीव गेल्यानंतरच प्रशासन जागे होणार का, असा संतप्त सवालही आता उपस्थित होत आहे.

या मार्गावरील वाहतूक सुरक्षित करण्यासाठी संबंधित विभागाने तातडीने पाहणी करून रस्त्यावर उभी केली जाणारी वाहने हटवावीत आणि नियमांचे उल्लंघन करणाऱ्यांवर कठोर कारवाई करावी, अशी जोरदार मागणी ग्रामस्थांकडून होत आहे.