देशातील २२ आयआयटींमध्ये ३८% प्राध्यापक पदे रिक्त; नऊ आयआयटींमध्ये आरक्षित प्रवर्गातील तब्बल ६०% जागा भरायच्या बाकी; जातनिहाय माहिती दिलेल्या संस्थांमध्ये SC, ST व OBC प्रवर्गातील ८८८ पदे रिक्त; गुणवत्तापूर्ण पीएचडी उमेदवारांची कमतरता असल्याचा आयआयटी प्रशासनाचा दावा
देशातील २२ आयआयटींमध्ये ३८% प्राध्यापक पदे रिक्त;
नऊ आयआयटींमध्ये आरक्षित प्रवर्गातील तब्बल ६०% जागा भरायच्या बाकी
जातनिहाय माहिती दिलेल्या संस्थांमध्ये SC, ST व OBC प्रवर्गातील ८८८ पदे रिक्त;
गुणवत्तापूर्ण पीएचडी उमेदवारांची कमतरता असल्याचा आयआयटी प्रशासनाचा दावा
नवी दिल्ली/वृत्तसेवा
देशातील अग्रगण्य भारतीय तंत्रज्ञान संस्थांमध्ये (IIT) प्राध्यापकांच्या रिक्त पदांचे प्रमाण चिंताजनक असल्याचे समोर आले आहे. उपलब्ध अधिकृत आकडेवारीच्या विश्लेषणानुसार, देशातील २२ आयआयटींमधील १२,१९८ मंजूर प्राध्यापक पदांपैकी ४,६४० पदे म्हणजेच ३८.०४ टक्के पदे अद्याप रिक्त आहेत. म्हणजेच प्रत्येक दहा पदांपैकी जवळपास चार पदे भरलेली नाहीत.
याहून गंभीर बाब म्हणजे जातनिहाय माहिती उपलब्ध करून देणाऱ्या केवळ नऊ आयआयटींमध्ये एकूण १,५०१ रिक्त पदांपैकी ८८८ पदे अनुसूचित जाती (SC), अनुसूचित जमाती (ST) आणि इतर मागासवर्गीय (OBC) प्रवर्गातील आहेत. म्हणजेच या संस्थांतील रिक्त पदांपैकी जवळपास ६० टक्के पदे आरक्षित प्रवर्गातील असल्याचे विश्लेषणातून स्पष्ट झाले आहे.
आकडेवारीनुसार, रिक्त पदांमध्ये ओबीसी प्रवर्गातील ४७७ पदे सर्वाधिक आहेत. त्यानंतर सर्वसाधारण प्रवर्गातील ४४३, एससी प्रवर्गातील २६१, आर्थिकदृष्ट्या दुर्बल घटक (EWS) मधील १७० आणि एसटी प्रवर्गातील १५० पदांचा समावेश आहे.
संस्थानिहाय पाहिल्यास, आयआयटी खरगपूरमध्ये सर्वाधिक ५१.३१ टक्के पदे रिक्त असून, १,६०० मंजूर पदांपैकी ८२१ पदे भरलेली नाहीत. त्यानंतर आयआयटी (ISM) धनबादमध्ये ४८.४ टक्के, तर आयआयटी गोवामध्ये ४५.८३ टक्के पदे रिक्त असल्याचे दिसून आले आहे.
दरम्यान, आयआयटी प्रशासनाने या परिस्थितीचे कारण स्पष्ट करताना, उच्च दर्जाचे पीएचडी उमेदवार कमी उपलब्ध असल्याचे सांगितले आहे. जागतिक पातळीवरील विद्यापीठे, संशोधन संस्था आणि डीप-टेक कंपन्यांकडून मोठ्या प्रमाणावर संधी मिळत असल्याने अनेक संशोधक तेथे प्राधान्य देतात. तसेच योग्य उमेदवार मिळेपर्यंत भरती प्रक्रिया कठोर निकषांनुसारच राबवली जात असल्याचा दावा संस्थांच्या संचालकांनी केला आहे.
बॉक्स : महत्त्वाची आकडेवारी
मंजूर प्राध्यापक पदे : १२,१९८
भरलेली पदे : ७,५५८
रिक्त पदे : ४,६४० (३८.०४%)
९ आयआयटींतील एकूण रिक्त पदे : १,५०१
SC/ST/OBC प्रवर्गातील रिक्त पदे : ८८८ (सुमारे ६०%)
टिप्पण्या