शिक्षक होण्याचे स्वप्न अपूर्ण राहिले... तरीही जिद्द, चिकाटी आणि मेहनतीच्या जोरावर अनिल जायभाये बनलेत एक्साईज उपनिरीक्षक

शिक्षक होण्याचे स्वप्न अपूर्ण राहिले... 

तरीही जिद्द, चिकाटी आणि मेहनतीच्या जोरावर 

अनिल जायभाये बनलेत एक्साईज उपनिरीक्षक 

अनिल कारभारी जायभाये 

सिंदखेडराजा:-

काही स्वप्ने अपूर्ण राहतात; मात्र त्याच अपूर्ण स्वप्नांतून नवे ध्येय गाठण्याची प्रेरणा मिळते. याच प्रेरणेचे जिवंत उदाहरण म्हणजे तालुक्यातील हनवतखेड येथील अनिल कारभारी जायभाये यांचे आहे. शिक्षक होण्याचे स्वप्न उराशी बाळगून शिक्षण पूर्ण केलेल्या अनिल यांनी परिस्थितीमुळे ते स्वप्न पूर्ण होऊ शकले नाही. तरीही न डगमगता जिद्द, चिकाटी आणि अथक परिश्रमांच्या बळावर अखेर महाराष्ट्र लोकसेवा आयोगाच्या (MPSC) माध्यमातून राज्य उत्पादन शुल्क विभागात एक्साईज पोलीस उपनिरीक्षक (Excise PSI) या मानाच्या पदावर नियुक्ती मिळवून उल्लेखनीय यश संपादन केले आहे.

लहानपणापासून शिक्षक बनून विद्यार्थ्यांना ज्ञानदान करण्याची त्यांची इच्छा होती. मात्र काळ आणि परिस्थितीने वेगळा मार्ग दाखवला. अनेकजण अशा प्रसंगी निराश होतात, परंतु अनिल जायभाये यांनी अपयशाला कधीही अंतिम सत्य मानले नाही. त्यांनी त्याच अपूर्ण स्वप्नाला नव्या यशाची प्रेरणा बनवत स्पर्धा परीक्षांचा मार्ग स्वीकारला.

सातत्यपूर्ण अभ्यास, प्रामाणिक मेहनत आणि आत्मविश्वासाच्या जोरावर त्यांनी प्रथम मुंबई पोलीस दलात स्थान मिळवले. त्यानंतर राज्य उत्पादन शुल्क विभागात सेवा करण्याची संधी मिळाली. मात्र एवढ्यावर समाधान न मानता त्यांनी अधिक मोठे ध्येय निश्चित केले आणि स्पर्धा परीक्षेची तयारी अखंड सुरू ठेवली.

कठोर परिश्रम, संयम आणि दृढ इच्छाशक्तीच्या बळावर त्यांनी अखेर एमपीएससी परीक्षेत यश मिळवत एक्साईज पोलीस उपनिरीक्षक (Excise PSI) पदावर नियुक्ती मिळवली. त्यांचे हे यश केवळ वैयक्तिक यश नसून संघर्ष करणाऱ्या आणि स्वप्नांसाठी सातत्याने मेहनत घेणाऱ्या प्रत्येक युवकासाठी प्रेरणादायी ठरणारे आहे.

अनिल कारभारी जायभाये यांच्या यशामुळे कुटुंबीय, मित्रपरिवार तसेच गाव आणि परिसरात आनंदाचे वातावरण निर्माण झाले असून विविध स्तरांतून त्यांच्यावर अभिनंदनाचा वर्षाव होत आहे.

राज्य उत्पादन शुल्क विभागात एक्साईज पोलीस उपनिरीक्षक (Excise PSI) पदावर नियुक्ती झाल्याबद्दल अनिल कारभारी जायभाये यांचे सर्व स्तरांतून मनःपूर्वक अभिनंदन करण्यात येत असून, त्यांच्या उज्ज्वल सेवाकार्यासाठी आणि भावी वाटचालीसाठी हार्दिक शुभेच्छा व्यक्त करण्यात येत आहेत.